Lukmanlar ilkinji gezek näsagyň göz hanasyndan aralaşmak arkaly oňurganyň çişini aýyrdylar

Amerikaly neýrohirurglar göz hanasyndan aralaşmak arkaly kelleçanagyň düýbündäki çişi aýyrmak bilen özboluşly operasiýany amala aşyrdylar. Operasiýa 19 sagat dowam etdi we munuň üçin ýokary takyklyk gerek boldy.

​

Operasiýa Merilend uniwersitetiniň lukmançylyk merkezinde geçirildi. Näsag 19 ýaşly Karla Flores bolup, ol öň beýniniň seýrek hordomasy sebäpli iki gezek operasiýa edilipdi. Täze çiş kelleçanagyň düýbünde, adaty usullar arkaly barmasy kyn ýerde ýerleşýärdi. Burundan, agyzdan ýa-da boýundan aralaşmak gaty howpludy.
Doktor Muhammet Labibiň ýolbaşçylygyndaky topar alternatiw ýoly - çep gözüň hanasyndan aralaşmagy teklip etdi. Operasiýa girişmezlerinden öň lukmanlar bu usuly jesetlerde tejribe edip gördüler.
Operasiýa wagtynda neýrohirurglar göz almasyny wagtlaýyn gapdala süýşürdiler, süňk dokumasynyň bir bölegini aýyrdylar we çişe golaý bardylar. Iş oňurga ýiligine ýakyn ýerde geçirildi - sähelçe ýalňyşlyk ysmazlyga sebäp bolup biljekdi.

​

Çiş aýrylandan soň, rekonstruktiw hirurg Kalpeş Wakhariýa butdan alnan transplantlaryň, titan plastinanyň we toruň kömegi bilen süňk gurluşlaryny täzeden dikeltdi. Iki günden soň Flores kelle süňki bilen oňurganyň arasyndaky baglanyşygy durnuklaşdyrmak üçin başga bir operasiýany etdi.
Näsag dikeldiş we proton bejergisini aldy. Bir ýyldan soň geçirilen barlaglar täzeden döreýiş alamatlaryny ýüze çykarmady.
Doktor Labib bu çemeleşmäniň kelläniň we oňurganyň çylşyrymly çişlerini bejermekde täze standart usul bolup biljekdigini aýtdy.

​