Uzakly gün güýç-kuwwat berýän ertirlik tagamlary agzaldy

Naharlanmak boýunça bilermenler günüň dowamynda bedeniň kuwwatlylygyny saklamaga kömek edýän 10 sany azyk önümini maslahat berdiler. Esasy şert – bu ganda şekeriň birden ýokarlanmagynyň hem-de ýadawlygyň öňüni almaga ýardam edýän beloklaryň, kletçatkalaryň we peýdaly ýaglaryň sazlaşykly sarp edilmegidir diýip, «Health» portalyna salgylanýan «MIR 24» ýazýar.

​

Sanawa adaty iýmitler-de, garaşylmadyk azyk önümleri-de girdi. Ýumurtga uzak wagtlap dokluk duýgusyny üpjün edýän belogyň iň oňat çeşmesi hasaplanýar. Süle ýarmasy (owsýanka) çylşyrymly uglewodlara we kletçatkalara baý bolup, ondaky zerur bolan energiýany beden kem-kemden özleşdirýär. Ertirlik edinilende, peýdaly azyk önümleriniň hatarynda beloklara we prebiotiklere baý grek ýogurdy, hozlar, aýratynam badam, çia tohumlary we miweler bar. Olar aşgazanyň saglygyny, beýniniň işini hem-de güýç-kuwwatyň derejesini saklamaga kömek edýärler.

​

Ertirlik üçin adaty bolmadyk iýmitler hökmünde merjimek we süýji ýeralma görkezildi, olar bedeni haýal özleşdirilýän uglewodlar bilen üpjün edip, ysgynsyzlygyň öňüni alýar. Ysmanak we losos balygy witaminlere hem-de Omega-3 ýag turşulyklaryna baýdyr.

​

Hünärmenler iň peýdaly ertirligi aýratyn azyk önümi däl-de, olaryň utgaşdyrylmagy hasaplaýarlar. Mysal üçin, miweli ýumurtga ýa-da hozly we miweli süle ýarmasy uzak wagtlap özüňi dok hem ruhubelent duýmaga ýardam edýär.

​