Ýurdumyzyň lukmançylyk orta hünär okuw mekdepleriniň okuw-usuly seminary geçirildi
Türkmenistanyň Prezidenti Serdar Berdimuhamedowyň baştutanlygynda Berkarar döwletiň täze eýýamynyň Galkynyşy döwründe ýurdymyzda bilim ulgamyny ösdürmek, halkara hyzmatdaşlygyny kämilleşdirmek we öňdebaryjy okuw jaýlary bilen tejribe alyşmak babatda uly işler amala aşyrylýar. “Garaşsyz, baky Bitarap Türkmenistan – bedew batly at - myradyň mekany” ýylynyň ilkinji günlerinde, 2026-njy ýylyň 24-nji ýanwarynda Türkmenistanyň SG we DS ministrligiň görkezmesi boýunça, I.Gandi adyndaky Aşgabat lukmançylyk orta okuw mekdebinde Arkadag, Aşgabat şäherleriniň we welaýatlarynyň lukmançylyk orta okuw mekdepleriniň wekilleriniň gatnaşmagynda okuw-usuly maslahaty geçirildi.
Gahryman Arkadagly Serdar Prezidentimiziň Türkmenistanyň orta hünär bilim edaralarynda döwrebap bilimli hünärmenleri taýýarlamakda halkara hyzmatdaşlygyny giňeltmek, dünýäniň bilim giňişligine işjeň goşulyşmak bilen ýurdumyzyň orta hünär okuw mekdepleriniň daşary ýurt döwletleriniň orta hünär okuw mekdepleri bilen hyzmatdaşlyk etmek tejribesi, I.Gandi adyndaky Aşgabat lukmançylyk orta okuw mekdebi bilen Northwest kollejiniň (ABŞ) arasynda özara düşünişmek hakynda Ähtnamanyň wezipelerini ýerine ýetirmegi bilen baglylykda, Türkmenistanyň lukmançylyk orta okuw mekdepleriniň mugallymlaryny onlaýn maslahatlaryna gatnaşdyrmak barada maslahatlaşyldy.
“Saglyk” döwlet maksatnamanyň wezipelerini ýerine ýetirmek babatda, idege mätäç adamlara hyzmat etmekde “Umumy ideg işi” hünäri boýunça lukmançylyk orta okuw mekdeplerinde başlangyç hünär bilimli “Kiçi şepagat uýalaryny” taýýarlamak ugrunda alnyp barylýan işler barada Balkan lukmançylyk mekdebiniň mugallymy içgin gürrüň berdi, toplan tejribesi bilen paýlaşdy we bu hünärmenlere zerurlygyň bardygyny belledi.
Ýewropa Bileleşiginiň Ýewropa Bilim gaznasynyň DARÝA taslamasynyň çäginde, SCAFFOLD usulyýetini ulanmak arkaly okatmak boýunça I.Gandi adyndaky Aşgabat lukmançylyk orta okuw mekdebiniň “trener” sertifikatly mugallymlary prezentasiýalary bilen çykyş etdiler. Şeýle-de gün tertibinde: mugallymlaryň ýerine ýetirýän işleriniň reýting bahalandyrmasyna goşmaça teklipleri bermek; lukmançylyk orta okuw mekdepleri üçin okuw kitaplary we okuw gollanmalary taýýarlamak; “Şepagatçylyk işi” dersini okatmakda imitasion usulynyň we situasion meseleleriň ulanylyşyny görkezmek; talyplaryň önümçilik we diplomdan öňki tejribeligini guramak, we dünýä standartlaryna laýyklykda kämilleşdirmek barada meselelere seredildi we degişli teklipler hödürlenildi.
