Halkara saglyk merkezleri müdiriýetiniň Kelle we boýun kesellerini bejeriş halkara merkezi
Halkara saglyk merkezleri müdiriýetiniň Kelle we boýun kesellerini bejeriş halkara merkezi ähli ugurlar boýunça lukmançylygyň iň öňdebaryjy gazananlaryna laýyk gelmek bilen saglygy goraýyş babatynda uly üstünliklere eýedir.
Bu merkez 2009-njy ýylda açyldy. Häzirki zaman tehnologiýalary we enjamlary bilen doly üpjün edilen bu halkara merkezde ýokary hünär derejeli lukmanlar tarapyndan gulak, burun, bokurdak, äň-ýüz, göz, neýrohirurgiýa, newrologiýa keselleri bilen ýüz tutýan ildeşlerimiziň we daşary ýurtly raýatlaryň saglyk ýagdaýlaryny kesgitlemek, bejermek işleri döwrebap derejede ýola goýlandyr.
Kelle we boýun kesellerini bejeriş halkara merkezinde maslahat beriş, keseli anyklaýyş, şöhle bilen anyklaýyş, angionewrologiýa, operasion we sterilizasion, intensiw bejeriş, fiziobejeriş, barlaghana, otorinolaringologiýa, äň-ýüz hirurgiýa, neýrohirurgiýa, oftalmologiýa bölümleriniň bolmagy näsaglary biynjalyk edýän kesel alamatlaryny hemmetaraplaýyn seljerip, anyklap, bejergi bellemäge giň mümkinçilikleri döredýär.
Maslahat beriş we anyklaýyş bölüminiň otorinolaringologiýa otagynda gulak, burun, bokurdak agzalary sebäpli ýüz tutýan näsaglar barlaglardan geçirilip, kesel kesgidi goýlup, gatnaw şertlerinde bejergileri, ýagny gulagy kükürt dykydan, iriňden arassalap, dermanlary ulanyp bejermek, gulaga eşidiş turbasyndan ýel üflemek, kentlewük badamlaryny ýuwmak, olara derman çalmak, burnuň içini derman bilen giňeldip ýuwmak, kukuşka usulynda burny we burunýan boşluklaryny arassalamak ýaly bejergi çäreleri geçirilýär. Näsaglarda ses gyrylmasy, sesiň yitirilmegi, çykmazlygy sebäpli ýüze çykýan keseller anyklanylýar we olara gatnawly ýada ýatymlaýyn şertde bejergi bellenilýär.
Kerrewligiň we kerligiň dikeldilmeginde we bejergisinde gowy neti je gazanmak eşidişiň bozulmagynyň ir ýüze çykarylmagyna bagly bolup durýar. Surdologyň otaglarynda eşidişiň dürli sebäplere görä peselmegi ýada näsagyň doly eşitmezligi: audiometriýa (eşidişi dürli ýygylykly ses bilen barlamak), timpanometriýa (eşidiş turbasynyň geçirijiligini, eşidiş süňkjagazlarynyň hereketini barlamak), täze doglan çagalaryň eşidi şini kesgitlemek, Bera testi (täze doglan we kiçi ýaşly çagalaryň eşidişini barlamak) arkaly barlaglardan geçirilýär. Täze doglan we kiçi ýaşly çagalaryň derman bilen ukladylan ýagdaýynda eşidişine toplumlaýyn baha berilýär. Pes eşidýän näsaglara eşidişiniň ýitirilme derejesine, görnüşine laýyklykda eşidiş enjamy saýlanyp, sazlanylyp dakylýar. Şeýlede otoplastika barlaghanada gulagyň daşky eşidiş geçelgesine laýyklykda eşidiş enjamlary üçin hususy gulak içki dykylary ýasalýar. Ol eşidiş enjamyndan kabul edilýän sesleriň arassa kabul edilmegine ýardam berýär. Gulakda galmagalyň bolmagyndan (tinnitus) ýada şonuň netijesinde başaýlanmadan, deňagramlylygyň bozulmagyndan ýarawsyz näsaglara anyklaýyş we bejeriş işleri geçirilýär.
Äň-ýüz hirurgyň otagynda äňýüz sebitinde, agyz boşlugynda duş gelýän doga kemislikleri — ýokarky dodagyň doga ýaryklary, ýumşak we gaty kentlewügiň ýaryklary, täze şikesleri, köne şikesleriň netijesinde ýüze çykan ýüz görküniň bozulmalary, äňleriň işjeňliginiň bozulmagy bilen bagly hemde implant goýmak üçin äňleriň süňk dokumalaryny dikeltmek, tüýkülik mäzlerinde döreýän duzly we daşly keselleri bilen ýüz tutýan näsaglar barlaglardan geçirilýär. Olara ilkinji kömek, gatnawly şertlerde bejergi berilýär, degişlileri bölümde ýatyrylýar.
Oftalmologiýa otagynda näsaglaryň görüş ýitiliginiň derejesi anyklanylýar. Şeýlede bu otagda uzakdan — miopiýada ýada ýakyndan pes görmeklik bolan gipermetropiýada hemde astigmatizmde näsaga äýnek kesgitlenip berilýär, enjamlaryň kömegi bilen gözüň içki basyşyny gysga wagtyň içinde kesgitläp, göze gara suw inme keseliniň öňüni alyp bolýar.
Otorinolaringologiýa bölüminde ulularda we çagalarda adenotomiýa (burun, damak badamlaryny aýyrmak), tonzillotomiýa (kentlewük badamynyň ujundan aýyrmak), tonzillektomiýa (kentlewük badamyny doly aýyrmak), hananyň dogabitdi atreziýasyny açmak (burun we burun damak aralygynyň doga kemisligini açmak), daşky burny we burun orta germewini göneltmek, burnuň ganaýan polipini aýyrmak, burnuň we burunýan boşluklarynyň endoskopiki operasiýasy (bu operatiw bejerginiň maksady burnuň gapdal diwarynyň anatomiki gurluşyny boldugyça az bozup, nemli bardany aýap, burunýan boşluklaryny patologiki hadysasyndan arassalap, howalanmak işini dikeltmek), damak, bokurdak kesellerinde lazer operasiýalary, mikrowideolaringoskopiki operasiýalar geçirilýär.
Gulakda eşidişi dikeldiji operasiýalary, ýagny ortaky gulagyň gaýnaglamasynda (ekssudatiw otitlerde ortaky gulaga suwuklygyň ýygnanmagy) fistulostoma goýmak (ortaky gulaga ýygnanan suwuklygy aýyrmak), timpanoplastika (ortaky gulagy arassalap, deprek perdesini goýmak) we başga-da birnäçe operasiýalar ýerine ýetirilýär. Germaniýaly kärdeşlerimiz bilen bilelikde stapedoplastika (sannaljyk eşidiş süňkjagazynda), kohlear implantasiýa operasiýasy (eşitmeýän näsaglara, esasanda, çagalara eşidiş implantyny goýmak arkaly eşidişi dikeltmek) geçirilip başlanyldy.
Äň-ýüz hirurgiýa bölüminde ýatymlaýyn şertde şu operasiýalar we bejergi çäreleri geçirilýär: diş sebäpli ýüze çykýan ýokarky äň boşlugynyň we agyz boşlugynyň plastikasy, ýüzde we agyz boşlugynda täze döremeleri aýyrmak, osteosintez (ýüzde, äňde süňkleri dikeltmek) operasiýa lary, sinuslifting (ýokarky äň boşlugynyň düýbüniň süňk dokumasyny galňatmak), implantasiýa (emeli usullar bilen äňlerde diş ýetmezçiligini dikeltmek), äň-ýüz sebitindäki fegmonany we absessleri kesmek, gingiwoplastika (agyz boşlugynyň nemli bardasyny dikeltmek), äňdäki täze döremeleri aýyrmak, gözhanasynyň düýbüniň şikesden soňky plastikasy (düýbüni dikeltmek), çykyp bilmän galan dişleri sogurmak, dodak we dil gasynlaryny kesmek.
Neýrohirurgiýa bölüminde kelle-beýni gipofiz mäziniň döremesini endonazal (burnuň içinden) az şikesli aýyrmak, mikrohirurgiýa usulynda üç şahaly nerw bilen gan damarynyň arasyny açmak (operasiýa Žanetta), kelle beýniniň köpri-beýnijik burçundaky we beýni esasynyň täze döremelerini aýyrmak, gidrosefaliýada (kelle beýnide suwuklygyň adatdan köp ýygnanmagy) şuntirleme, periferiki nerwiň kesellerinde neýrorafiýa (nerwiň tikilmegi), newroliz (nerwiň bertiklerden arasynyň açylmagy), çagalarda kelle çanagyň, beýniniň, oňurganyň, oňurga ýiliginiň anomaliýa (dogabitdi kemisligi) ösüşini bejermek, ingileri aýyrmak operasiýalary geçirilýär.
Oftalmologiýa bölüminde glaukoma, miopiýa, işemiýa, damarly bardalaryň sowuklama, torly bardalaryň bozulmalarynda bejergileri, kataraktada, glaukomada, refraksiýanyň anomaliýasynda (görüş ýiti liginde bozulmalary), göz şikeslerinde operatiw bejeriş usullary häzirki zaman tehnologiýalary arkaly döwrebap derejede ýerine ýetirilýär. Bulardan başga-da, göz ýaş ýollarynyň, gözüň we göz hanasynyň howply we howpsuz çiş kesellerini bejermek, ýokarky we aşaky gabaklardaky ingileri aýyrmak bilen blefaroplastika (gabak plastikasy — ýokarky gabakda gasyn ýasamak, göz yşlaryny giňeltmek, epkantusy aýyrmak) operasiýalary döwrebap derejede geçirilýär.
Angionewrologiýa bölüminde merkeziň ýörite ugurly lukmanlary bilen maslahatlaşylyp, ýüz sebitinde, kelle beýnide döreýän agyrylaryň ýüze çykmagynyň sebäpleri doly anyklanylyp, bejergiler bellenilýär. Merkezi we periferiki nerwleriň neýropatiýalaryny, üç şahaly nerwiň newralgiýasyny, ýüz nerwiň newritini bejermek işleri, esasan hem, insultdan soňky irki we giçki dikeldiş bejergileri geçirilýär.
Anesteziologiýa we intensiw bejeriş bölüminde agyr näsaglara güýçlendirilen bejergi çäreleri amala aşyrylýar hem-de agyrysyzlandyrmanyň dürli usullary ulanylyp, näsaglarda operasiýalar geçirilýär. Kelle boýun sebitinde geçirilýän operasiýalarda, operasiýa meýdanynyň anesteziýa ýeri bilen bir ýerde bolmagy, refleksogen, gan damarlara baý zonada işlenilmegi, operasiýanyň sazlanylýan gipotoniýa ýagdaýda ýerine ýetirilýändigi sebäpli jogapkärçilik ýokarydyr. Anesteziýanyň häzirki zaman dermanlarynyň ulanylyp geçirilmegi näsaglaryň operasion stolda basym oýanyp, gysga wagtda anesteziýanyň täsirinden çykmagyna ýardam edýär.
Şöhle bilen anyklaýyş bölüminde ýader-magnit-rezonans tomografiýa barlagynyň elektromagnit tolkunlaryny güýçli magnit meýdanynda ulanyp, kompýuter tomografiýa rentgen usulynda kelläniň we burun ýan boşluklarynyň, çekge süňküniň, boýnuň şekiliniň kesimleýin dürli tekizlikde geçirilmegi keseli anyklamaga hemde bejeriş usulyny saýlap almaga ýardam edýär. Şeýle-de bölümde geçirilýän rentgen we ultrases barlagy, EKG, EhoKG barlaglary näsaglarda keselleri wagtynda anyklamaga mümkinçilik berýär.
Barlaghana bölüminde kesel alamatlary bilen baglylykda ganyň umumy, biohimiýa, immunologiýa barlaglary geçirilýär.
Fiziobejergi bölüminde bejeriş-öňüni alyş çäreleri, elektrobejeriş, bejeriş-sagaldyş owkalamasy, bejeriji fiziki maşklary, iňňerefeks bejergileri geçirilýär.
Merkeziň lukmanlary ýurdumyzda we daşary ýurtlarda geçirilýän halkara ylmy-tejribe maslahatlaryna işjeň gatnaşýarlar. Hormatly Prezidentimiziň saglygy goraýyş ulgamyny dünýäniň ylmy gazananlary we tejribeleri esasynda ösdürmek, özgertmek babatynda öňde goýýan wezipelerine laýyklykda lukmanlarymyz daşary ýurtlaryň ösen saglyk merkezleri bilen hünär taýýarlygy babatynda yzygiderli hyzmatdaşlyk saklaýarlar, bilelikde amaly işleri alyp barýarlar.
Edaranyň ady: Halkara saglyk merkezleri müdiriýetiniň Kelle we boýun kesellerini bejeriş halkara merkezi
Salgysy: 744036, Türkmenistan, Aşgabat şäheri, «Saglyk» (1970-nji) köçesi, 14-nji jaý
Telefon belgisi: +993 (12) 48-97-02, +993 (12) 48-96-03
Faks belgisi: +993 (12) 48-83-06
E-poçta salgysy:
Gatnaw ulaglary:
Awtobuslar: 8, 19, 20, 32, 34, 35, 37, 42, 103, 142
Ugur almak üçin bellik: Halkara lukmançylyk merkezleri
Edaranyň kartada ýerleşýän ýeri: Ýandeks Karta
